بــــحـــلــــم بــــيــــكـــى

بحلم بيكى
وبكتم صوتى جوايا
وبعمل من السكوت موال
أدندن بيه حروف أسمك
ساعات أزعل وساعات أغضب
وأكتر وقتى بغازلك
يابلدى
ويوحشنى كتير غيطانك
وشوارعك وناسك
وأنا فـــ بعدى عنك
أضم حروف أسمك
على صدرى
وأروح فـ النوم
أشوفك مأذنة وجامع
أشوفك قمر ساطع
أشوفك ضل عنباية
وتوته ونخله والبلح
طالع
أشوفك شجرة توته
وصفصافه
بدلى الضفاير منها
على وش الميه بالراحه
والبعد وان كان يبعدنى
عنك عمره ماكان بالراحه
أشوفك نجمه بتغنى
فوق فــ السما عالى
وأشوفك قمرايه
والكل يطلب ودك
بس المهر غالى
صباح نادى على عيونك
ومساء الفل على ولادك
وصوت قنديل يفوقنى
أشمر كمى وأتوكل
على الرحمن
وضم الآيد فـ الآيد
وأقول ياأهل السرو
والله من زمان
عيشين سوى صحبه
أكتر من الخلان
تعالى نتوضى من نيلها
وندندن يالىَ نغنيلها
عمر الخلاف مايبعدنا
ومع صوت الآدان ندعيلها
واحنا ولادك يابلدنا
عمر الزعل مايكون
ولا اختلاف الرآى
يلغى هوا مكنون