الراجل ده بيقول كلام زى الفل (من أشعار على سلامه).......

على باب سفارة كندا

على باب سفارة كندا لمحت إبليس و فى إيده إستمارة بقوله على فين
قالى بس يا هجرة يا إعارة أنا كفرت ملاقيش معاك سيجارة
يا راجل خلاص لا بقيت وسواس و لا خناس ولا ليا عيش وسط الناس
بقالى سنين عاطل و إنتوا بتعرفوا تقلبوا الحق باطل
و بتقتلوا القتيل و تسلكوا القاتل و خلاص مفيش مشاكل
خلاص أنا مسافر مهاجر يا راجل ده أنا بقيت أوسوس بالشقلوب
أقول للحرامى إنتا مش هتتوب يعنى إنتا هتعمل كل الذنوب
و أنا إبليس أشتغل إيه واعظ ولا كمسرى ف أتوبيس
يا راجل ده أنا زمان كنت أستنى الواحد ينسى و هو بياكل لقمته
دلوقتى الصراحة كل أكلكوا ملوث و الواحد بيخاف على صحته ده مفيش ضمير أساسا عشان أموته
يا راجل ده أنا من كتر ما لطشت معايا مشيت مع الناس الى بتقول كفاية و برضه مش لاقي نهاية