حكايتي مع التأمين الصحي .... يا قلبي لا تحزن .... تجربة لا تنسى

حكايتي مع التأمين الصحي ..... يا قلبي لا تحزن .... حقاً تجربة لا تنسى !!!!!

بداية سلامه عليكم ، ( أنا محمود نبيه ) مواطن مصري زيي زي أي حد بسيط بحلم و الحلم مشروع مش حرام طالما بحلم بالخير و لكن اللي حصلي أعتقد إنه مش غريب بس ممكن يكون طبيعي بس زعلني شويه ، لأ شويتين ، عموماً : نبتدي منين الحكاية مع خالص اعتذاري للعندليب ، تبدأ الحكاية من إني أعمل أخصائي صحافة بالتربية و التعليم بمرسى مطروح رحت المدرسة اللي أنا شغال فيها و عندي زي ميكروب شكل القوبة بيطلعلي كل سنة تحت عيني الشمال بحوالي 2 سم و المره دي جه تحت جفني السفلي لعيني الشمال مباشرةً و طبعاً خيلني قلت لنفسي ما انت عندك بطاقة تأمين متعمل جواب تأمين بدل متروح لدكتور خصوصي و تدفع فيزيتا عالية مهو أنا من معدومي الدخل ، أقصد محدودي الدخل ، عموماً إدارة المدرسة تفضلت مشكورة و حست بيا و عملي مدير المدرسة جواب بكل سهولة و دي الحاجة الوحيدة اللي كانت سهلة في الموضوع ، عموماً خدت الجواب و رحت التأمين الصحي الساعة الثانية عشرة ظهراً ، طبعاً أول حاجة قابلني موظف الاستعلامات في التأمين الصحي أخد مني البطاقة و كتبلي وصل بجنيه و قالي ادفعه في الخزينة رحت و دفعت ، بعد كده قاللي هتكشف إيه قولت له جلدية قاللي ماشي ، و حولني للممارس العام فقولتله أنا عايز جلدية قاللي ماشي ما هو الممارس هيحولك قولت في عقل بالي ماشي جايز ده إجراء طبيعي . عموماً طلعت الدور الثالث للممارس العام و اسمه دكتور ( م . ش ) عموماً استنيت دوري و لا حظت إن اللي بيدخل عند الدكتور ( م . ش ) بيتأخر فاستغربت مش من العادة إن دكتور يأخر مريض في تأمين أو مستشفى عام المعظم بيقلب و خلاص ، عموماً جه دوري بصراحة قابلت دكتور قمة في الوسامة و الجنتلة و الأدب و ده أسعدني جداً و قولت و الله مصر بخير المهم الدكتور سألني فيه إيه قولت له على حالتي فشاف تحت عيني و قالي مبتشتكيش من حاجة تانية قولت له لأ قاللي متأكد ، قولت له إن شاء الله ، قاللي مش مضايق من حاجة ، لاحظت إنه حتى ممكن يعالج نفسي بابتسامته الرقيقة و المتواضعة بصراحة كان إنسان جداً و لا حظت كل اللي هناك بيدعوله بصلاح الحال يا ريت كل الدكاترة زيه و الله ده كلام جد مش تريقة ربنا يصلح حاله هو و كل واحد زيه ، المهم الدكتور ( م . ش ) طلب من الممرضة روشتة عشان يكتب العلاج على اعتبار إن حالتي لا تستدعي تحويل لدكتور جلدية فنبهته إن دي بتطلعلي كل سنة فقال للمرضة استني قال لازم يشوفه دكتور جلدية أنا فكرتها حالة عارضة ، فوجئت إنه حولني لقسم الباطنة في التأمين ، قولت جايز شك إن ده من إفرازات البطن و المعده فهي بيت الداء و قولت ده عادي فبقوله يا دكتور أنا عايز جلدية ، أتاري مفيش جلدية في التأمين المهم قاللي روح للإستعلامات رحت و طبعاً مسبونيش رحبو بيه بوصل تاني ب 2 جنيه للخزينة ( كده بقوا 3 جنيه ) المهم دفعت في الخزينة و طلعت لدكتور الباطنة و اسمه( م . ي . ح ) المهم ملقتوش موجود طلعتلي الممرضة قولتلها أنا هكشف هنا و لا فين قالتلي حسب المكتوب في البطاقة لأن فيه عيادتين باطنة عموماً بصت في البطاقة و قالتلي الواد ده حمار قصدها طبعاً على بتاع الاستعلامات بهزار أصل هما أخدين على بعض اصحاب بقى و ده عادي المهم سألت هي بتاع الاستعلامات و رجعتلي تاني قالتلي الدكتور عنده لجنة قولتلها هيتأخر قالتلي لما يخلص كل دول بصيت و اتصدمت لقيت طابور عريض من المرضى و المجبسين مستنيين الفرج لاعتماد الأجازات الخاصة بهم عموماً أنا صعبت على الممرضة و قالتلي هشوف الدكتور ( ع ) يرضى يكشف عليك بدل الدكتور ( م . ي . ح ) فتفضل مشكوراً دكتور ( ع ) و وافق إنه يكشف عليا ، و طبعاً استنيت دوري يا قلبي لا تحزن ، المهم دخلت في دوري ، شافني الدكتور و قرا التقرير المكتوب من الممارس و قاللي طيب أعمل إيه انت المفروض تكشف جلدية ، قولت له عارف ما أنا استغربت إني اتحولت باطنة قاللي انت اتحولت باطنة عشان مفيش جلدية ، قولت له آه ، قوللي كده ، عموماً قاللي عندك مانع ان احنا نحولك لقسم الجلدية للمستشفى العام ، قولت له لأ ، قاللي بس هيبقى بكره لأن الوقت اتأخر الساعة بقت ( 3 عصراً ) يعني بقالي ( 3 ساعات ) في التأمين المهم كتبلي تحويل و لقيت الممرضة اللي معاه بتديني وصل ب ( 2 جنيه ) كده بقوا ( 5 جنيه ) بتقولي ادفعه في الخزينة و امضي التحويل من الدكتور ( ي ) مدير العيادة ، المهم دفعت و طلعت تاني عشان امضي التحويل من الدكتور ( ي ) مدير العيادة و المفاجأة الكبيرة إني بعد ما خلصت كشف عند دكتور الباطنة التاني بعد ما أخدت دوري إن اللجنة خلصت و الناس مشيت و أنا لسه مخلص يعني لو كنت استنيت الدكتور الأولاني كنت خلصت المهم المفاجأة الأكبر و أنا رايح أمضي التحويل إن مدير العيادة مشي و طبعاً المطلوب مني أجي تاني يوم المهم بلعت لساني و سكت و رحت المدرسة و المدير جاي يكلمني توقعت هيقولي اتأخرت ليه لكن خاب ظني سألني قالي عملت إيه فحكيت له الوضع و طبعاً زعل جداً ، المهم عدى اليوم و قمت تاني يوم بدري عشان أمضي التحويل الساعة 9 صباحاً و الحمد لله مضيت التحويل و قولت يا فرج الله أروح أكشف بقى في المستشفى العام المهم كنت في المستشفى الساعة 9.45 صباحاً و دكتور الجلدية مش موجود طبعاً محدش بيتكلم و يقول ليه مجاش أنا الوحيد اللي اتكلمت بس باستغراب مش بحدة و لا هجوم قولت جايز عنده حالة جوه المستشفى أتاري هو مش موجود أساساً و مكتوب عليا استنى المهم الفرج جه بحضور الممرضة اللي كانت موجودة قبل ما أجي المهم ادتلها التحويل و لقيت قدامي طابور عريض من الورق و التحويلات قولتلها أنا قدامي كل دول قالت آه ، قولتلها و الدكتور لسه مجاش ، قالت آه ، المهم جه الدكتور ، عارفين الساعة كام " 10.35 صباحاً " و العيادات الخارجية بالمستشفى بتقفل الساعة ( 11 صباحاً ) يعني يدوب يكشف يقلب و مشي حالك يا معلم ما احنا بنتضرب في الخلاط و أهي دنيا و عايشين فيها " و قول يا باسط . المهم استنيت دوري و أنا ميعاد المدرسة في الفترة المسائية الساعة 11.15 صباحاً قولت يا ربي أروح المدرسة و أرجع و لا أستنى دوري و أخد اليوم عارضة و خلاص المهم لقيت الناس بتخش و تطلع بسرعة " اقلب و عدي قبل القطر ما يفوتك " طبعاً الدكتور ( أ . ا ) عنده عيادة بره و الناس مستنياه هناك المهم هداني ربي لإني أتصل بمدير المدرسة و أشرح له الوضع اللي أنا فيه بصراحة الراجل قالي ألف سلامة متشيلش هم هنعملك إذن و احنا في انتظارك بس خلص و تعالى علطول المهم دخلت للدكتور ( أ . ا ) اديته البطاقة بتاعت التأمين بتاعتي عشان يشوف التقرير ، و الله ما بصلي غير لما كلمته و قولت له إن ده ميكروب بيجيلي كل سنة المهم كتبلي علاج و قاللي مش عارف ده هتلاقيه في التامين و لا لأ طبعاً رحت التأمين تاني عشان يكتبولي العلاج في روشته فشافه الدكتور ( ع ) اللي كنت عنده امبارح و قاللي اسأل في الصيدلية ده موجود و لا لأ ، طبعاً أنا كنت متوقع ده ، المهم سألت في الصيدلية ، فقالتلي الدكتورة اللي في الصيدلية إحنا عندنا من ده بس 200 و اللي مكتوبلي 800 يعني المفروض أخد جرعة مضاعفة أربع مرات و قالتلي المرهم ده موجود بس للعين ، طلعت للدكتور تاني و قولتله فقالي ماشي روح لمدير العيادة يصدق على العلاج ، المهم مدير العيادة تفضل مشكوراً و صدق على العلاج " كتر خيره " رحت للدكتور ( ع ) تاني عشان يكتب الروشتة و لقيته كاتب جرعتين من الكبسول ( 2 شريط 200 ) مش ( 4 ) بقوله مش المفروض( 4 ) قالي ماهو الكبسولتين من ده بـ 1000 من التاني قولتله آه و قولت في عقل بالي ( ما أنا داقق عصافير مبفهمش ) المهم نزلت الصيدلية فقالتلي الدكتورة ( 1.5 جنيه ) كده يبقى أنا دفعت كام ؟؟؟ شاطرين ( 6.5 جنيه ) يعني لو كنت رحت المستشفى العام من الأول كنت دفعت ( 2 جنيه و خلاص ) بس نعمل إيه قلت أنا عندي تأمين ، المهم قلت يا فرج الله و خدت ديلي في اسناني و ركبت المشروع " السرفيس " عشان أروح المدرسة الساعة كام بقى " الساعة 11.45 صباحاً ، و أنا ماشي بالعربية لقيت دكتور الجلدية ( أ . ا ) ماشي بعربيته ما هو خلص قلب أقصد كشف ) يعني يا دوب ساعة " بصراحة بيتعب " خلاصة الموضوع ، سيدي الفاضل وكيل وزارة الصحة و السكان بمطروح ، سيدي الفاضل محافظ مطروح ، سيدي الفاضل وزير الصحة و السكان ، سيدي الفاضل رئيس مجلس الوزراء ، سيدي الفاضل و والدي العزيز و الأب الروحي لجميع المصريين سيدي الرئيس " بابا محمد حسني مبارك " أناشدكم جميعاً الفصل في هذا الأمر فقد تعبنا جميعاً من استهتار و استخفاف بعض المسئولين في وزارة الصحة رغم الجهود المبذولة التي شعرنا بها من قِبل السيد الفاضل دكتور حاتم الجبلي " وزير الصحة و السكان " .

أتمنى زوال هذه الاستهتارات أو على الأقل تقليلها .
فهل هناك أعز و أغلى من صحة الإنسان ؟؟؟؟؟؟؟؟؟؟
فعلاً : حكايتي مع التأمين الصحي ...... تجربة لا تُنسى .

محمود نبيه زعرب